Konsultejo
Akademio de Esperanto en 1999 starigis komisionon Konsultejo de la Akademio, al kiu povas turni sin ĉiu Esperanto-uzanto per difinitaj lingvaj demandoj por ricevi konsilon aŭ rekomendon. Demandojn pri vortfarado (novaj nocioj, terminoj) la komisiono povas respondi relative rapide; ĉe komplikaj gramatikaj problemoj kutime daŭras pli longe. La respondoj ne estas decidoj de la Akademio de Esperanto, sed rekomendoj de la konsult-komisiono; tamen la Akademio esperas ke utilas tiu ĉi rapida servo, pri kies manko ofte oni plendis.
Kiel demandi al la Konsultejo?
Vi povas:
- uzi la demandoformularon (preferinde)
- sendi retpoŝton al “konsultejo” ĉe “akademio-de-esperanto.org”
- sendi leteron al la direktoro de la Konsultejo: Boris Kolker, 2487 North Taylor Rd, Apt 11, Cleveland Heights, OH 44118, Usono
La Konsultejo ne povas akcepti demandojn per telefono.
Klare formulu la demandojn, kaj demandu konkrete. Bonvolu indiki ĉe urĝaj demandoj, ĝis kiam vi esperas ricevi respondon. Rapidan respondon ni povas garantii nur al demandintoj, kiuj disponas pri ret-adreso aŭ telefakso.
La komisiono petas, nepre ne sendi bagatelajn demandojn, kiujn povas respondi ĉiu sperta esperantisto, serĉante en vortaroj kaj aliaj konsult-libroj. (Vidu ankaŭ sube la regularon.)
Membroj
Membroj de la komisiono (en alfabeta ordo de ĉefnomoj): Marc Bavant, Gerrit Berveling, D-ro Renato Corsetti, D-ro Paul Gubbins, Miguel Gutiérrez Adúriz, D-ro Boris Kolker, Li Shijun, Prof. Jouko Lindstedt, François Lo Jacomo, Anna Lowenstein, Barbara Pietrzak Otto Prytz, Prof. Amri Wandel, Bertilo Wennergren.
Regularo de Konsultejo de la Akademio de Esperanto
- Adreso por demandoj estas tiu de la direktoro; li akceptas demandojn per ordinara letero, telefakso kaj interreto, sed ne per telefono. Se oni faras demandon al alia Akademiano, tiu ĉi transdonu ĝin al la direktoro de la konsultejo.
- La direktoro analizas la demandon kaj en okazo de bezono (do se li ne povas mem respondi, ĉar ne estas tre simpla afero) transdonas ĝin - eventuale kun komentoj - al la komisionanoj. Por tio kutime li uzas formularon kun voĉdonilo. La komisionanoj klopodas respondi ene de la indikita tempo al la direktoro.
- La direktoro sendas la demando-formularon per retpoŝto ne nur al la koncernaj membroj de la komisiono, sed al ĉiuj rete atingeblaj Akademianoj; ankaŭ ili havas, kompreneble, la rajton interveni, kion ili faru precipe kiam estas demando, pri kiu ili aparte kompetentas. La komisionanoj ne ligitaj al interreto ricevas la formularon per telefakso aŭ ordinara poŝto.
- La direktoro kolektas la respondojn kaj post la limdato kalkulas la voĉdonojn laŭ la reale ricevitaj respondoj (do inkluzive de tiuj de ne-komisionanoj). Se egalas la nombroj de jesaj kaj neaj voĉdonoj, la direktoro povas submeti la demandon al dua decido.
- Se la komisiono trovas klaran decidon, la direktoro komunikas tion al a) la demandinto, b) la komisionanoj kaj ĉiuj Akademianoj rete atingeblaj, c) al Esperanto-gazetaro kaj gravaj movadaj instancoj (precipe UEA). Por tiu komuniko la direktoro uzas formalan tekstumon kun la karakterizo de la rekomendo, kiu ne estas decido de la Akademio de Esperanto.
- Se la komisiono ne trovas interkonsenton, la direktoro aŭ denove submetas - kun komentoj - la demandon al la komisiono aŭ prezentas ĝin al la koncerna sekcio aŭ al la Pleno de la Akademio por plia studado. Se la komisiono ankaŭ en dua voĉdonado ne trovas pozitivan rezulton, la direktoro komunikas tion al la demandinto; la direktoro mem decidas, ĉu pri la afero li informas ankaŭ la adresatojn nomatajn en punkto 5 sub litero c).
- La estraro de la Akademio decidas, ĉu aperigi rekomendojn de la konsultejo en siaj cirkuleroj kaj en eventuale kreota publika informilo.